Wanneer u vermoed dat u kind of 'n familielid dwelms gebruik

Wees kalm-dit is nie 'n skande nie, genesing is moontlik.  Onthou, niemand begin dwelms gebruik met die idee om verslaaf/afhanklik te word nie.  Moenie uself blameer nie, verwyte, 'n geneul, 'n geprekery kan 'n muur veroorsaak tussen u en die ander party.  Moenie die afhanklike verneder of u woede/vernedering na die persoon oordra nie.  Hou die kommunikasiekanale oop vir gesprek.  Dit is egter nie nodig om die persoon in watte toe te draai deur hulle te beskerm teen die gevolge van hul dwelmmisbruik nie.  Moenie u kind afskryf nie: 'n onmiddelike 100% gedragsverandering gaan nie gebeur nie.  Help u kind om tot 'n besluit te kom, maar dit is net u kind wie self die besluit kan neem om sy lewe positief te verander.  Motiveer en ondersteun hom/haar deurlopend en wys op die positiewe aspekte van hul lewe en kry professionele hulp vir albei van u.  Gee aan die persoon hoop en moet nooit self hoop verloor nie.

Wat kan ouers doen om kinders teen dwelmgevare te beskerm

Ken u kind
Maak tyd om met u kind te gesels en te LUISTER.
Praat met u kinders oor dwelms
Wees betrokke by u kind se skool
Help u kind met sy vryetydsbesteding.  Kweek by u kind 'n belangstelling vir stokperdjies: lees, dans, musiek, sport, die natuurlewe, naaldwerk, houtwerk, kraletjiewerk, daar is so baie.
Leer u kinders om "nee te sê."
Help kinders om gesonde waardes te ontwikkel
Wys dat jy omgee

Bontebok Primer Dag Uitstappie

SDF het op 6 Maart hul eerste Skole Dag Uitstappie gehou.

Die Graad 7 klas van Bontebok Primer het Saterdagoggend by die Marloth Natuur Reservaat se ingang bymekaar gekom. Na 'n lekker ontbyt van toebroodjies en vars plaas melk, het die Graad 7's speletjies gespeel. Ons het in 5 groepe van 10 opgedeel en nadat almal goed ingelig was oor die moets en moenies van die reservaat, het die staptog begin na die Waterval aan die bo-punt van Duiwelsbos. Die "All Blacks-spannetjie" het entoesiasties die voortou geneem met die "HAKA".
Die weer was perfek: ligte mis en nie te warm nie. Die lang, steil kllim na die waterval is beloon met yskoue bergwater en 'n ruskans vir moee voete. Geluk ook aan die "Blou Bulle" wat dit uiteindelik bo gemaak het - al was daar nie 'n yshouer met koeldrank nie!!!

Terug by die piekniekplek is ons ontvang met heerlike worsbroodjies en yskoue koeldranke. Dr du Toit het met die groep gesels oor die invloed en gevolge van dwelms, asook giftige slange, spinnekoppe en die verskillende inheemse en uitheemse bome in die reservaat. "The Reds" het uitgeblink met hul kennis oor die uitwerking van slanggif.

Voordat almal die laaste staptog terug na die voertuie aangepak het, het ons weer in ons kleiner groepe opgedeel en die dag bespreek.

Baie dankie Maureen, Lida, Rochelle en almal wat gehelp het om die uitstappie 'n sukses te maak. Die organisasie was puik, die kos was heerlik en almal het die dag gate uit geniet.
SDF sien uit na die volgende uitstappie.

Hartverskeurend

Dit is hartverskeurend om 'n ma te sien huil oor haar kind wat dagga/tik gebruik.  BADISA se voorsitter, oom Dirks, noem hulle "flenter" mense.  Ek wonder partykeer wie is meer flenters: die kind of die ouers.  Wie is meer gestroop van sy selfrespek: die ouer of die kind.
Dis oor-en-oor dieselfde simptome: my kind gaan nie meer skool nie, hy slaap nie by die huis nie, steel allerlei goedere in die huis, versorg homself nie meer nie, verloor gewig, is aggressief met almal.  Van agter my lessenaar droom ek van 'n dwelmvrye dorp - ek kan dit egter nie alleen doen nie.
Wat doen jy?
Verkoop jy dwelms aan 'n kind?
Moet jy dwelms verkoop?
En jy wat stilbly, wat weet wie waar wat verkoop, moet jy stilbly?
En jy wat kan help om die regte inligting aan kinders oor te dra, wat kan help om 'n brug te bou na 'n beter lewe - waar is jy?
Het jy geweet: "Evil wins when good people do nothing."
Maatskaplike Werker
BADISA

Dag Uitstappie

Een van die inisiatiewe van SDF, is om alternatiewe daar te stel vir die jeug. Op 6 Maart 2010 gaan die Graad Sewes van Laerskool Bontebok op 'n uitstappie in Marloth NP. Die groepie gaan vroeg Saterdagoggend, om 7h00 by die Thusong Sentrum bymekaar kom en van daar na Marloth vervoer word. Die staptog gaan ongeveer 2 uur duur. Daarna gaan wors gebraai word, Love Life gaan speletjies aanbied en 'n informele praatjie en groepbespreking gaan gehou word. Die dag gaan afgesluit word met 'n sokker wedstryd.
Dit gaan 'n wonderlike dag in die natuur wees, so maak seker jou vrywaringsbrief is ingevul en jou plek is bespreek.

Word klein dorpe die teiken van Drug Lords?

Die volgende berig was op die 6h oggend nuus bulletin op KFM. (Vrydag, 5 Feb 2010, gelees deur Regan Thaw)
DRUG LORDS TARGET SMALL TOWNS.
Many rural towns across South Africa that have been targeted by syndicates are ill-equipped to resist, drug abuse experts said on Thursday.
The Medical Research Council said drug trafficking groups have expanded their  operations to smaller towns on an increasing basis.
Like legitimate businesses, drug dealing syndicates also compete among themselves, constantly expanding their nefarious activities.
In recent months the MRC said these networks have been moving into small, rural towns.
Drug lords reportedly believe that law enforcement in such towns is not as effective as urban areas.
Annette Hubschle, from the institute for Security Studies, said small coastal towns were also equally important to traffickers.
"The majority of drugs still go out on ships along the coast like Knysna; and ultimately the drugs have to arrive in these places, for dealers and runners," said Hubschle.
Many rural towns also lack adequate drug treatment facilities.

Wie is Swellendam Dwelmforum?

Swellendam Dwelm Forum (SDF) is einde 2009 gestig met die doel om Swellendam en omgewing se jeug in te lig en te beskerm teen die gevare van dwelms. SDF se Scribbles dien as 'n platform vir die organisasie om inligting deur te gee, vir die gemeenskap om betrokke te raak, vrae te vra en aktief deel te neem.
Ons missie is om rolspelers te mobiliseer in die stryd teen dwelms, om alternatiewe daar te stel vir die jeug en om ondersteuning te verskaf waar dit nodig mag wees.
Die benadering van die Forum is om veral voorkomende interaksie te ontwikkel.

• Inligtingsessies,
• vryetydsbesteding,
• groepbesprekings en 
• bewusmaking deur die plaaslike media, is van die inisiatiewe wat geiimplimenteer gaan word.

Kanale vir toegang tot professionele hulp word ontwikkel asook voortgesette ondersteuning na 'n periode van moontlike rehabilitasie.

Dwelmmisbruik in skole

Die volgende artikel het in die Republikein (2003) verskyn en dit beklemtoon die gebruik van dwelms in ons skole. Dit is uiters belangrik dat ouers, onderwysers en leerders hulself vergewis van die tekens van dwelmgebruik.

Dwelmmisbruik gedy op skool

DWELMMISBRUIK onder kinders het die afgelope sewe jaar verdubbel en kinders wat met dwelms eksperimenteer, raak steeds jonger.
So sê Grant Jardine, bestuurder van die jeuguitreikprogram by die Kaapstadse Dwelmvoorligtingsentrum. Hulle behandel jaarliks tot 900 mense.
Volgens Grant het tussen 'n derde en die helfte van seuns voor Graad 11 al onwettige dwelms gebruik. Die meeste van hulle het voor die ouderdom van dertien reeds begin eksperimenteer.
"Dit is 'n groot bekommernis," sê Mnr. Jardine. "As kinders op 'n vroeë ouderdom begin, is die kanse dat hulle verslaaf sal word baie groter."
Die mees algemene dwelms wat gebruik word, is alkohol, dagga, mandrax, "crack", kokaïen en heroïen. Ongelukkig is daar niks wat ouers kan doen om te verhoed dat hulle kinders aan dwelms blootgestel word nie.
Dwelmmisbruik kom in alle skole voor en alle kinders sal op een of ander stadium moet besluit of hulle met dwelms gaan eksperimenteer of nie. Volgens Grant kan ouers hulle kinders voorberei vir die dag dat hulle hierdie besluit moet neem.
Hy gee die volgende riglyne:

o Lig eerstens jouself in oor dwelms. Dit sluit die beskikbaarheid, voorkoms en newe-effekte in.
o Bespreek dwelms met jou kind.
o Luister na jou kind en moenie moraliseer of preek nie.
o Moenie bangmaakstories vertel nie. Dit werk nie.
o Probeer om die situasie van sy/haar kant te verstaan.
As jou kind dwelms gebruik, is daar 'n verandering in sy algehele gedrag. Moenie paniekerig raak as jou kind net een of twee kenmerke toon nie.
Wees op die uitkyk vir die volgende tekens:
o Tekens van bybehore wat gebruik word vir dwelmgebruik. Dit sluit in gebreekte bottelnekke, gebrande lepels, lemmetjies en foelie.
o Rooi oë en/of vlekke op hande
o Skielike gewigsverlies of -toename
o Sleeptong praat
o Onsamehangende gesprekke en vinnige verandering van een onderwerp na die ander.
o Verlies van belangstelling in en genot van dinge wat hy voorheen geniet het.
o Verandering van kleredrag en vriende.
o Swakker prestasie op skool. (Yourhealth)